Esta selmana viense cellebrando dende 1980 na primer selmana del mes de
mayu, y dende 1989 suel tar rellaciona a un autor o autora importante de
la lliteratura n'asturiano.Ye una fecha señalá pa munches instituciones y áreas diferentes. Así, los profesores de llingua y literatura asturiana avecen a facer dalgo nes sos clases rellacionao col autor al que ta dedicá la selmana (o a la manifestación lliteraria nel so casu), y les autoridaes autonómiques impliquense na defensa del idioma. Asina, nos postreros años cellébrense recitales de poesía na Xunta Xeneral o repartos de llibros o DVD de manera gratuita.
El Gobiernu asturianu dedica la 33 Selmana de les Lletres Asturianes a los autores de la Ilustración asturiana y en concretu a los poetes Benito de l’Auxa (1742-1814) y Antón Balvidares
(1751-1792), dos escritores de la llamada «xeneración del mediu
sieglu». Cohesionaos so la influencia de Xovellanos como parte del
grupu de los “Bableferidos”, asumieron la visión renovadora y crítica
que suponía l’espíritu ilustráu y al traviés d’un refináu cultivu
lliterariu en llingua asturiana enfrentáronse a les formes del Antiguu
Réxime dominante nesos momentos del XVIII y que duraría hasta entamos
del XIX.
El programa d’actos que’l Gobiernu d’Asturies preparó pa
homenaxar a estos autores, cuntando en tou momentu cola collaboración de
toles entidaes públiques y privaes comprometíes, inclúi ente otros, la
celebración de dellos actos de calter institucional, presentación de
llibros y recitales, dramatizaciones o actividaes escolares, así como la
publicación de dos importantes obres preparaes espresamente pa la
ocasión: Al rodiu de la poesía ilustrada, volume colectivo qu’inclúi artículos, estudios y collaboraciones de 8 prestixosos escritores ya investigadores asturianos; y Poesíes,
obra completa conocida de los dos autores, compilada y presentada con
estudiu críticu a cargu del profesor del Seminariu de Filoloxía
Asturiana de la Universidá d’Uviéu, Xuan Carlos Busto Cortina.
Los
actos d’homenaxe a Benito de l’Auxa y Antón Balvidares y a les lletres
asturianes van tener llugar dende’l llunes, 30 d’abril hasta’l vienres 4
de mayu por toa Asturies con actos y eventos concretos n’Uviéu, Xixón,
Grau y Santalla, amás de los conceyos orixinarios de los homenaxaos:
Carreño y Sariegu. Nellos van collaborar un bon númberu de persones,
ente estudiosos, escritores, dramaturgos, etc. Ye de destacar tamién la
participación de la comunidá educativa y, bien especialmente, la
collaboración del Colexu Públicu Salvador Vega Berros, de Vega (Sariegu)
centru que va acoyer l’actu escolar de celebración d’esta Selmana.
L’actu de Sariegu cuntará tamién con la asistencia de miembros de la
familia Fernández-Vega, descendientes del poeta homenaxeáu Antón
Balvidares.
La
Casa Natal de Xovellanos ye l’escenariu nel que se va celebrar –el
llunes 30 d’abril a les 12:30hores– la presentación de los actos d’esta
33 Selmana de Les Lletres Asturianes y de la primera de les dos ediciones conmemoratives: Al rodiu de la poesía ilustrada, al cargu de Juan Carlos Villaverde Amieva, profesor tamién del Seminariu de Filoloxía Asturiana de la Universidá d’Uviéu.
Lo que se fai nesta selmana
El
Muséu Casa Natal de Xovellanos acoyó esti llunes la inauguración de la
XXXIII Selmana de les Lletres Asturies, dedicada a Benito de l’Auxa y
Antón Balvidares. Nel actu presentose’l volume ‘Al rodiu de la poesía
ilustrada’.
El primeru en tomar la pallabra foi Rubiera, que fixo referencia
al llugar de la presentación, la casa natal de Gaspar Melchor de
Xovellanos, “onde se falaba davezu n’asturianu”, como amosaba la carta
en castellanu que l’ilustráu xixonés unvió nel 1791 al so hermanu
Francisco de Paula. “Xovellanos falaba davezu na llingua del país”,
continuó’l conceyal, “al igual que la clase ilustrada, ensin complexu y
vergoña”, pa depués recordar l’enfotu de Gaspar Melchor y la so hermana
pequeña Xosefa pa cola llingua asturiana. Tamién fixo referencia a los
dos poetes a los que ta dedicada la Selmana, L’Auxa y Balvidares,
ilustraos “que falaben y escribíen na llingua del país”, a la que
definió como “un estraordinariu patrimoniu de la humanidá”.
Álvarez González, pela so parte, destacó’l trabayu desendolcáu en comuña
pola so conseyería cola de Cultura y Deporte cola fin de “caltener a
una llingua asturiana viva cada día”, col exemplu de la Selmana de les
Lletres Asturianes, “tiempu de celebración, a la vez que de reflexón”.
Tamién falo de la importancia de la Ilustración y del papel de los
asturianos ilustraos.
El direutor de Política Llingüística destacó la collaboración importante
del Seminariu de Filoloxía Asturiana pal desarrollu d’estos trabayos.
“La Universidá asume esti papel de liderar lo que ye la investigación
filolóxica, lliteraria y llingüística del asturianu”.
La manifestación
La manifestación
El conciertu
No hay comentarios:
Publicar un comentario